O‘zbekiston-Qozog‘iston: Davlat xizmatiga kirishda ochiq tanlov tizimi bo‘yicha tajriba almashishdi
Uchrashuv O‘zbekiston Respublikasi Prezidenti huzuridagi Davlat xizmatini rivojlantirish agentligi va Qozog‘iston Respublikasi Davlat xizmati ishlari bo‘yicha agentligi rahbariyati, vakillari ishtirokida bo‘lib o‘tdi.
Maʼlumot uchun, ushbu muloqot 2022-yilning dekabrida, oliy darajadagi tashrif davomida tashkilotlar o‘rtasida imzolangan o‘zaro anglashuv memorandumi doirasida tashkil qilindi.
Muloqot avvalida tashkilotlar rahbariyati nutq so‘zlab, davlat xizmati sohasida hamkorlikni kuchaytirish va tajriba almashishni muntazam yo‘lga qo‘yish ahamiyatli ekanligini taʼkidlashdi.
Shundan so‘ng, tashkilotlar vakillari davlat xizmatiga ishga kirishda ochiq tanlovlar tizimlari faoliyati, erishilgan natijalar bo‘yicha taqdimot qilishdi. Platformalar faoliyatidagi o‘xshash va farqli jihatlar tahlil qilinib, mavjud muammolar, yechimlari bo‘yicha fikr almashildi.
Tomonlar o‘zaro tajriba almashish maqsadida hamkorlik ishlarini muntazam davom ettirishga kelishib olishdi.
